Ni Suwapang nila Cong. ang Kickback

 By Mortz C. Ortigoza

Nagpapasalamat ang isang Mayor sa Diyos dahil iyong nilalakad niyang malapit sa two hundred million pesos na project na galing sa national government ay ni download na sa bank account ng municipio.

“Walang mangyayari pag ni download nila sa DPWH hindi na sa amin mapupunta na kay Congresswoman na” ani Mayor.

Anong ibig sabihin pag napunta na ang project kay Congresswoman? Ibig sabihin niyan ay susolohin na ng mambubutas ng upuan sa Kongreso, este, mambabatas ang S.O.P o kickback sa pinili niyang contractor na kasabawat sa moro-moro sa bidding sa Department of Public Works & Highway.

Ang kalakaran sa kickback sa kalsada, slope protection at tulay sa Pinas ay umiikot sa 10 to 20 percent. Pag suwapang iyong pulitiko aabot pa ng 30 percent kaya iyong ibang kontratista nilalagyan ng kawayan sa halip na bakal na bituka ang konkretong kalsada – gaya sa nangyari noon sa isang bayan sa Pangasinan na nabisto - dahil halos nasimot na ng Congressman ang tubo niya.

***

Mabuti pa iyong pamilya ng isang pulitiko sa isang distrito sa probinsiya ko may limit ang pagkagahaman. Sabi noong mayor na naka inuman ko ng “hard” o Kuwatro Kantos Markang Demonyo – anak ng bakang dalaga! – mabuti pa daw iyong pamilya na iyon pag dating sa hatian ng kickback.

“Kada project na galing sa national government na gagawin sa bayan ko, nagbibigay si ABCD (pangalan ng contractor ni Congressman) ng porsiyento sa akin. Ganoon din ang ginagawa nila sa ibang Mayor dito sa Distrito,” ani ng Alkalde.

Sa palagay ko ginagawa iyan ni Congressman at ng pamilya niya na naging mambabatas rin: Una, hindi siguro sila suwapang sa kita nila sa nakaw; Ikalawa, istrategy nila iyan na makuha ang loyalty ng mga mayors kung sakaling may makakalaban sila sa eleksiyon.

***

Naalaala ko tuloy iyong isang Mayora na mangiyakngiyak na nagsumbong sa akin na matapos ilakad ng ilang taon iyong proyekto sa National Irrigation Administration (NIA) na tens of millions of pesos na project, noong ni download sa DPWH ng Department of Budget ang pondo gusto ng solohin ni Congresswoman ang S.O.P.

“Pinaglaban ko iyong project kasi ako iyong naglalakad at nag follow noon sa Manila pero tinawagan ako at pinagalitan ako ng mister ng Congresswoman na ihinto ko iyong ginagawa ko dahil si mister ko ay nangu-nguntrata rin sa kanila”.